اسلام آباد ( نئی تازہ رپورٹ) الیکشن کمیشن نے حکم جاری کیا ہے کہ ریٹرننگ افسران کسی ایک جماعت کے امیدوارکو دوسری جماعت کا انتخابی نشان نہ دیں۔
الیکشن کمیشن آف پاکستان کا یہ حکم نامہ پی ٹی آئی کا پلان بی سامنے آنے کے بعد جاری کیا گیا ہے۔
پی ٹی آئی کی جانب سے قومی و صوبائی اسمبلی کے امیدواروں کوپاکستان تحریک انصاف نظریاتی کے ٹکٹس جاری کیے گئے تھے۔
پی ٹی آئی کے بیان میں کہا گیا تھا کہ تمام امیدوار تحریک انصاف نظریاتی کے ٹکٹس آر اوز اور ڈی آروزکے دفاتر میں جمع کرائیں۔
واضح رہے کہ پاکستان تحریک انصاف نظریاتی کا نشان بلے باز ہے، یہ جماعت پی ٹی کے نا راض گروپ کی طرف سے 2012 میں قائم کی گئی تھی جس کے سربراہ اختر اقبال ڈار ہیں۔
الیکشن کمیشن نے اس حوالے سے جاری بیان میں کہا ہے کہ الیکشن ایکٹ کے تحت امیدوار اپنی پارٹی وابستگی کا سرٹیفکیٹ دیتا ہے، ایک شخص ایک وقت میں ایک سے زیادہ جماعتوں کا رکن نہیں ہوسکتا۔
الیکشن کمیشن نے کہا کہ ایسی درخواستیں موصول ہوئی ہیں جن سے الیکشن کمیشن کو دھوکہ دیا جارہا ہے۔
