اسلام آباد( نئی تازہ رپورٹ) وزارت انفارمیشن ٹیکنالوجی نے ’پاک حج‘ کے نام سے موبائل ایپ متعارف کرادی۔
نگران وفاقی وزیر برائے آئی ٹی ڈاکٹر عمرسیف اور نگران وفاقی وزیر مذہبی امور انیق احمد نے موبائل ایپلی کیشن کا اجرا کیا۔
این آئی ٹی بی کی تیار کردہ موبائل ایپ سے عازمین حج کیلئے تمام ضروری معلومات دستیاب ہوں گی۔
وزیر مذہبی امور انیق احمد نے ایپ کی تیاری میں ڈاکٹر عمر سیف کے تعاون کو سراہا، موبائل ایپ کو اردو اور انگلش میں بنایا گیا ہے، حج سے قبل اس ایپ میں مقامی زبانیں بھی شامل کر دی جائیں گی۔
انہوں نے بتایا کہ موبائل ایپلیکیشن انسٹال ہونے کے بعد آف لائن بھی کام کرے گی،عازمین حج کی رہنمائی کیلئے شارٹ کلپس تیار کر کے موبائل ایپ سے بھجوائیں گے۔
نگران وفاقی وزیر ڈاکٹر عمر سیف نے کہا خصوصی سرمایہ کاری سہولت کونسل (ایس آئی ایف سی) کی ہدایت کے مطابق ملک میں ڈیجیٹلائزیشن کا عمل تیز کر دیا ہے، عازمین کی درخواست، مناسک حج کی ادائیگی اور واپسی تک تمام معلومات ایپ میں موجود ہیں۔
انہوں نے کہا کہ پاک حج ایپ میں حج گروپ کی معلومات، تربیتی شیڈول اور سعودی عرب میں رہائش سے متعلق امور بھی شامل ہیں۔
