سابق امریکی وزیر خارجہ ہنری کسنجر 100 برس کی عمر میں اپنے گھر میں انتقال کر گئے۔
غیر ملکی میڈیا کی رپورٹ کے مطابق اُن کی کمپنی ڈاکٹر کسنجر ایسوسی ایٹس نے ایک بیان میں ان کی موت کا اعلان کرتے ہوئے بتایا کہ ایک معزز امریکی اسکالر اور تجربہ کار شخصیت ہنری کسنجر کنیکٹی کٹ میں اپنے گھر میں انتقال کر گئے۔
بیان کے مطابق سابق وزیر خارجہ کی آخری رسومات کے لیے ان کے اہل خانہ نجی طور پر اہتمام کریں گے، بعدازاں یادگاری تقریب نیویارک میں منعقد کی جائے گی۔
بیان میں کسنجرکی موت کی کوئی وجہ نہیں بتائی گئی، میڈیا رپورٹ کے مطابق ہنری کسنجر 100 برس کی عمر میں آخری وقت تک انتہائی فعال رہے، وہ رواں برس جولائی میں چینی صدر شی جن پنگ سے ملاقات کے لیے چین گئے تھے۔ ہنری کسنجر آخری وقت تک انتہائی فعال رہے، وہ وائٹ ہاؤس میں میٹنگز میں بھی شریک ہوتے تھے۔
ہنری کسنجر نے کئی کتابیں تحریرکیں جن میں سفارتکاری اور قیادت سے متعلق امور پر اہم نکات شامل ہیں۔
چین کے ساتھ امریکا کے تعلقات ہنری کسنجر کے اہم اقدامات میں سے ایک ہے، سوویت یونین ( متحدہ روس) کے خلاف سرد جنگ کے پیشِ نظر کسنجر نے چین کا خفیہ دورہ کیا تھا ، جس کا نتیجہ 1972 میں امریکی صدر رچرڈ نکسن کے دورہ چین اور بعد میں چین کے ساتھ امریکی تعلقات کے قیام کی صورت میں سامنے آیا۔
ہنری کسنجر نے سیکریٹری آف سٹیٹ ( وزیر خارجہ) اور نیشنل سیکیورٹی ایڈوائزر کے طور پر بھی ذمہ داریاں سرانجام دیں، اُن کو ویتنام جنگ ختم کرانے کے لیے مذاکرات پر نوبل انعام سے نوازا گیا۔
