راولپنڈی( نئی تازہ رپورٹ) پاک فوج نے 2 ریٹائرڈ افسران عادل فاروق راجا اور حیدر رضا مہدی کو بغاوت پر اکسانے سمیت دیگرجرائم ثابت ہونے پر کورٹ مارشل کے ذریعے سزا سنا دی۔ دونوں کے رینک ضبط کر لیے گئے۔
پاک فوج کے شعبہ تعلقات عامہ (آئی ایس پی آر) سے جاری بیان کے مطابق میجر (ریٹائرڈ) عادل فاروق راجا اور کیپٹن (ریٹائرڈ) حیدر رضا مہدی کو پاکستان آرمی ایکٹ 1952 کے تحت فیلڈ جنرل کورٹ مارشل (ایف جی سی ایم) کے ذریعے سزا سنائی گئی . انہیں فوجی اہلکاروں کو بغاوت پر اکسانے، آفیشل سیکرٹ ایکٹ 1923 کی دفعات کی خلاف ورزی کرنے اور ریاست کے تحفظ اور مفاد کے برخلاف کام کرنے کا قصور وار پایا گیا۔
آئی ایس پی آر کے مطابق دونوں کو عدالت نے 7 اکتوبر اور 9 اکتوبر 2023 کو عدالتی کارروائی کے تحت مجرم قرار یتے ہوئے فیصلہ سنایا، میجر (ریٹائرڈ) عادل فاروق راجا کو 14 سال قید بامشقت جبکہ کیپٹن (ریٹائرڈ) حیدر رضا مہدی کو 12 سال قید بامشقت کی سزا سنائی گئی۔
ترجمان پاک فوج کے بیان کے مطابق سزا کے تحت 21 نومبر 2023 سے دونوں افسران کے رینک ضبط کر لیے گئے ہیں۔
