واشنگٹن ( نئی تازہ رپورٹ) امریکی ریاست مین Maine کے شہر لیوسٹن میں مسلح شخص کی فائرنگ سے 22 افراد ہلاک اور متعدد زخمی ہو گئے ۔ پولیس کے مطابق فائرنگ کرنے والا مشتبہ شخص فرار ہو گیا ہے جس کی تلاش شروع کر دی گئی ہے۔
امریکی میڈیا کے مطابق ریاست مین کے شہر لیوسٹن میں ایک مسلح شخص نے دو مختلف مقامات پر جدید ہتھیار سے شراب خانے اور ریستوران میں لوگوں کو نشانہ بنایا اور فرار ہو گیا۔
میڈیا رپورٹ کے مطابق لیوسٹن پولیس نے بتایا کہ مسلح شخص نے پہلے اسکیمگیز بار میں فائرنگ کی اور پھر چھ کلو میٹر دور واقع باؤلنگ کلب میں لوگوں کو نشانہ بنایا۔
دونوں واقعات میں 22 افراد ہلاک اور درجنوں زخمی ہوئے ہیں۔
پولیس نے فائرنگ کرنے والے مشتبہ شخص کی تصویر جاری کرتے ہوئے اس کی گرفتاری کے لیے کوششیں تیز کر دی ہیں اور شہریوں کو ہدایت کی ہے کہ وہ گھروں پر رہیں۔
پولیس حکام نے بتایا ہے کہ مسلح شخص کی شناخت 40 سالہ رابرٹ کارڈ کے نام سے کی گئی ہے۔
مین سٹیٹ پولیس نے اپنے بیان میں کہا کہ لیوسٹن میں ایک مسلح شخص موجود ہے۔ شہری محفوظ جگہ پر پناہ لے لیں۔ دروازے بند کرکے اپنے گھروں کے اندر رہیں۔ قانون نافذ کرنے والے ادارے فی الحال متعدد مقامات پر تفتیش کر رہے ہیں۔
لیوسٹن پولیس ڈپارٹمنٹ نے مشتبہ شخص کی تین تصاویر جاری کرکے عوام سے شناخت میں مدد کی درخواست کی ہے، جن میں اسے ایک سیمی آٹومیٹک گن کے ساتھ دیکھا جاسکتا ہے جبکہ ایک تصویر سفید ایس یو وی گاڑی کی ہے۔
اینڈروسکوگن کاؤنٹی شیرف آفس نے بھی مشتبہ شخص کی تصاویر پوسٹ کیں۔
