راولپنڈی ( نئی تازہ رپورٹ) سائفر کیس میں چیئرمین پی ٹی آئی عمران خان اور شاہ محمود قریشی پر فردِ جرم عائد کر دی گئی ہے۔
آفیشل سیکریٹ ایکٹ عدالت کے جج ابوالحسنات ذوالقرنین نے اڈیالہ جیل میں سماعت کی۔
یاد رہے کہ 17 اکتوبر کو فردِ جرم عائد کرنے کی تاریخ مقرر کی گئی تھی تاہم تحریک انصاف کے وکلا کی جانب سے چالان کی کاپیاں فراہم نہ کرنے کا اعتراض اٹھایا گیا تھا۔
پی ٹی آئی کے اعتراض کے بعد فردِ جرم کی تاریخ 23 اکتوبر مقرر کی گئی تھی۔
سماعت کے موقع پرراولپنڈی میں اڈیالہ جیل کے باہر سخت سکیورٹی انتظامات مکمل کیے گئے اور پولیس کی اضافی نفری تعینات کی گئی ۔
عمران خان اور شاہ محمود قریشی نے صحت جرم سے انکار کیا ، کیس کی سماعت 27 اکتوبر تک ملتوی کر دی گئی۔
اس سے قبل چیئرمین پی ٹی آئی عمران خان کے وکلا عمیرنیازی اور نیاز اللہ نیازی اڈیالہ جیل پہنچے۔
واضح رہے کہ عمران خان اور شاہ محمود قریشی ان دنوں سائفر کیس میں اڈیالہ جیل میں قید ہیں۔
