راولپنڈی( نئی تازہ رپورٹ) آفیشل سیکرٹ ایکٹ کے تحت سائفر کیس میں چیئرمین پی ٹی آئی عمران خان اوروائس چیئرمین شاہ محمود قریشی کے خلاف فرد جرم کی کارروائی مؤخر ہوگئی۔
آئندہ سماعت پر23 اکتوبرکو دونوں پر فرد جرم عائد کی جائے گی۔
پراسیکیوٹر شاہ خاور نے کہا کہ چالان کی تمام ضروری نقول فراہم کر دی ہیں، آئندہ تاریخ سماعت 23 اکتوبر کو فرد جرم کے ساتھ ہی گواہان طلبی ہوگی۔ وکیل شیر افضل مروت نے کہا کہ چیئرمین پی ٹی آئی کا مورال بلند ہے۔
وکلائے صفائی نے شاہ محمود قریشی کے خلاف جیل ٹرائل پر قانونی اعتراض اٹھایا۔
پراسیکیوٹر نے کہا کہ شاہ محمود قریشی کے جیل ٹرائل کا نوٹیفیکیشن ہوچکا ہے، جس پر وکیل صفائی نے کہا کہ نوٹیفیکیشن آج ہوا اس لیے آج سے قبل جیل ٹرائل کی تمام کارروائی غیر قانونی ہے۔
چالان کی مکمل نقول دونوں ملزمان چیئرمین پی ٹی آئی اوروائس چیئرمین شاہ محمود قریشی کو فراہم کر دی گئیں۔
اڈیالہ جیل میں سماعت کے دوران خصوصی عدالت کے جج ابو الحسنات ذوالقرنین نے کہا کہ آئندہ تاریخ پر صرف فرد جرم کی کارروائی ہوگی۔
