لاہور( نئی تازہ رپورٹ) ورلڈ کپ 2023 کے لیے پاکستان کرکٹ اسکواڈ کا اعلان کر دیا گیا، انجری کا شکار نسیم شاہ کی جگہ حسن علی کوٹیم میں شامل کیا گیا ہے۔
بھارت میں ہونے والے ورلڈ کپ کے لیے بابر اعظم کو کپتان اور شاداب خان کو نائب کپتان برقرار رکھا گیا ہے جبکہ فاسٹ بولر نسیم شاہ کی جگہ حسن علی کو موقع دیا گیا ہے۔ نسیم شاہ انجری کی وجہ سے فٹنس مسائل سے دوچار ہیں ۔ قومی ٹیم کے ساتھ ایک ہی وکٹ کیپر محمد رضوان بھارت جائیں گے۔
چیف سلیکٹر انضمام الحق لاہور میں پریس کانفرنس کرتے ہوئے نے کہا کہ فاسٹ بولرز میں آپشن کم تھی، حسن علی نے لنکن لیگ میں اچھا کھیل پیش کیا، حسن علی کے آنے سے ٹیم میں انرجی آتی ہے۔
انضمام الحق نے کہا کہ ایشیا کپ کی ٹیم بنانے کے وقت حسن علی کی انگلی زخمی تھی ، فاسٹ بولرز میں احسان اللہ اور محمد حسنین بھی فٹنس مسائل سے دوچار ہیں، ہم نے چھ ماہ سے بنے کمبی نیشن میں تبدیلی کی کوشش نہیں کی۔
انہوں نےکہا کہ نسیم شاہ کا بڑا نقصان ہوا اور وہ اس وقت دنیا کا بہترین فاسٹ بولر ہے، رپورٹس کے مطابق نسیم شاہ ورلڈ کپ کے بعد بھی جلد نہیں کھیل سکے گا۔
انضمام الحق کا کہنا تھا کہ ہمیں صرف ایک تبدیلی پر مجبور ہونا پڑا ہے جس کا تعلق بدقسمتی سے نسیم شاہ کی انجری سے ہے۔
ورلڈ کپ کے لیے قومی ٹیم کے 15 رکنی اسکواڈ میں کپتان بابر اعظم، امام الحق، فخر زمان، عبداللہ شفیق، وکٹ کیپر محمد رضوان، سلمان علی آغا، افتخار احمد، سعود شکیل، شاداب خان، محمد نواز، اسامہ میر، محمد وسیم جونیئر، شاہین شاہ آفریدی، حارث روف اور حسن علی شامل ہیں۔
جبکہ محمد حارث، زمان خان اور ابرار احمد ریزرو کھلاڑی ہوں گے۔
ورلڈ کپ 5 اکتوبر سے 19 نومبر تک بھارت میں کھیلا جائے گا۔ ورلڈ کپ سے قبل پاکستانی ٹیم 29 ستمبر کو نیوزی لینڈ اور 3 اکتوبر کو آسٹریلیا کے خلاف وارم اَپ میچز کھیلے گی۔ پاکستان ورلڈ کپ میں اپنا پہلا میچ 6اکتوبر کو نیدر لینڈ کے خلاف کھیلے گا۔
