لاہور( نئی تازہ رپورٹ) مسلم لیگ (ن) کے صدرسابق وزیراعظم شہباز شریف اورپارٹی کی سینئر نائب صدر مریم نواز لندن روانہ ہو گئے۔
پارٹی ذرائع کے مطابق شہباز شریف ہنگامی بنیادوں پر لندن روانہ ہوئے جبکہ مریم نواز کی روانگی پہلے سے شیڈول تھی ۔
ذرائع کے مطابق مریم نواز لندن میں اپنی بیٹی کے داخلے کے لئے جا رہی ہیں جبکہ وہ اپنے والد اور سابق وزیراعظم نواز شریف سے بھی تفصیلی ملاقات کر کے انہیں وطن واپسی کی تیاریوں کے حوالے سے آگاہ کریں گی۔
معلوم ہوا ہے کہ مسلم لیگ ن کے صدر کو نواز شریف نے طلب کیا ہے جس پر وہ ہنگامی بنیادوں پر جمعرات کو لندن روانہ ہوئے۔ سابق وفاقی وزیر اور مسلم لیگ ن کی ترجمان مریم اورنگزیب نے بتایا کہ شہباز شریف کو نواز شریف نے اہم مشاورت کے لیے طلب کیا ہے اور وہ جلد وطن واپس آجائیں گے۔
یہ امر قابل ذکر ہے کہ شہباز شریف لندن میں ایک ماہ قیام کے بعد دو روز قبل ہی وطن واپس پہنچے تھے۔
قبل ازیں مسلم لیگ (ن) کی چیف آرگنائزر مریم نواز نے سابق وزیر اعظم شہباز شریف کے گھر پہنچ کر اہم ملاقات کی۔ ملاقات میں دونوں رہنماوں کی لندن روانگی، پارٹی قائد کے وطن واپسی، استقبال اور قانون امور پر مشاورت کی گئی۔
