لاہور( نئی تازہ رپورٹ) سانحہ نو مئی کی مشترکہ تحقیقاتی ٹیم نے چیئرمین پی ٹی آئی عمران خان کو14 میں سے دس مقدمات میں قصور وار قرار دے دیا ہے۔
نجی ٹی وی کے مطابق سانحہ نومئی سے متعلق مقدمات کی تفتیش کرنے والی جے آئی ٹی نے 14 مقدمات کی تفتیش مکمل کرلی ہے۔ ذرائع کے مطابق چیئرمین پاکستان تحریک انصاف کے خلاف مرکزی مقدمہ 96/23 کا چالان دو ہزار صفحات پر مشتمل ہے، چئیرمین پی ٹی آئی کے خلاف صرف سوشل میڈیا سے متعلق چار سو سے زائد شواہد حاصل ہوئے ہیں،
معلوم ہوا ہے کہ گرفتار ملزمان کے بیانات اور نشاندہی پر چئیرمین پی ٹی آئی کو گنہگار قرار دیا گیا۔
مشترکہ تحقیقاتی ٹیم کے ذرائع کے مطابق جناح ہاؤس حملے میں براہ راست ملوث 80 ملزمان کے بیانات میں سازش کا عنصر واضح ہوا، نو مئی کے واقعات سے متعلق دوران تفتیش براہ راست سازش کے شواہد بھی ملے، چیئرمین پی ٹی آئی کے اپنے بیانات حالات سے متضاد پائے گئے۔
ذرائع کے مطابق دیگر نو مقدمات میں بھی ٹھوس شواہد حاصل ہونے پر چیئرمین پی ٹی آئی گنہگار قرار پائے،بتایا گیا ہے کہ 14 مقدمات کا چالان جلد عدالت میں جمع کرادیا جائے گا۔
