اسلام آباد ( نئی تازہ رپورٹ) بلوچستان سے تعلق رکھنے والے انوار الحق کاکڑ نے بطور نگران وزیر اعظم عہدے کا حلف اٹھا لیا ہے۔
پیر کو ایوان صدر میں منعقدہ تقریب کے دوران صدرمملکت عارف علوی نے انوار الحق کاکڑ سے حلف لیا۔ اس موقع پر سابق وزیر اعظم شہباز شریف بھی موجود تھے۔
انوار الحق پاکستان کے آٹھویں نگران، جبکہ مجموعی طور پرملک کے 32 ویں وزیراعظم ہیں۔
انوار الحق کاکڑ نے حلف برداری سے قبل بطور سینیٹر اپنا استعفی چئیرمین سینیٹ کو بھجوایا جسے 14 اگست کی صبح چیئرمین سینیٹ صادق سنجرانی نے منظورکر لیا، انوارالحق کاکڑ کی سینیٹ سے نشست 14 اگست 2023 سے خالی قرار دے دی گئی ہے۔
سینیٹ سیکریٹریٹ نشست خالی ہونے کا نوٹیفیکیشن جاری کر دیا ہے۔ قبل ازیں انوار الحق کاکڑ نے سوشل میڈیا پر اپنی ایک پوسٹ میں کہا تھا کہ میں نے نگران وزیراعظم کی سونپی گئی ذمہ داری کے سبب بلوچستان عوامی پارٹی کی بینادی رکنیت اور سینیٹ کی ممبرشپ سے مستعفی ہونے کا فیصلہ کیا ہے۔