دنیا کی سب سے بڑی میسیجنگ ایپلی کیشن واٹس ایپ ایک نیا فیچر متعارف کرا رہی ہے، صارفین اب ایک ہی ایپلی کیشن میں ایک سے زیادہ اکاؤنٹس چلا سکیں گے۔
میڈیا رپورٹس کے مطابق واٹس ایپ نے ایک نیا فیچر متعارف کرایا ہے جس کے تحت صارفین اب ایک ہی ایپلی کیشن میں ایک سے زیادہ اکاؤنٹس چلا سکیں گے۔ اس فیچر کو اب تک کا واٹس ایپ کا سب سے بڑا اور اہم فیچر قرار دیا جا رہا ہے۔
آن ڈیوائس ملٹی اکاؤنٹ سپورٹ فیچرکے تحت صارفین ایک ہی فون میں کئی واٹس ایپ اکاؤنٹس پر لاگ ان ہو سکیں گے۔ یعنی واٹس ایپ کی ایپلی کیشن میں فیس بک یا ٹوئٹر کی ٹوئٹ ڈیک جیسا فیچر متعارف کرایا گیا ہے، جس کے تحت صارف ایک سے زائد اکاؤنٹ کو ایک ہی ایپلی کیشن اور ڈیوائس پر استعمال کر سکے گا۔
نئے فیچر کے ذریعے صارفین واٹس ایپ سیٹنگز مینیو میں اپنے نام کے آگے بنے ڈاؤن ایرو پر کلک کرکے مختلف اکاؤنٹس استعمال کر سکیں گے اورنئے اکاؤنٹس کو ایڈ کر سکیں گے۔
پ اس سے قبل واٹس ایپ میسیجنگ ایپ اور بزنس کو الگ الگ ایپلی کیشنز کے ذریعے ایک ہی ڈیوائس پر چلانا ممکن تھا، تاہم نئے فیچر کے بعد بزنس اور میسیجنگ ایپ کے بھی متعدد اکاؤنٹس ایک ساتھ چلائے جا سکیں گے۔ممکنہ طور پر ایسے اکاؤنٹس کی حد پانچ تک ہو سکتی ہے۔
ہر صارف ایک ہی موبائل اور ایک ہی واٹس ایپ ایپلی کیشن پر 5 مختلف میسیجنگ اور 5 مختلف بزنس اکاؤنٹ چلاسکے گا۔
مذکورہ فیچرواٹس ایپ کا سب سے نمایاں اور بٖڑا فیچر قرار دیا جا رہا ہے، صارفین کے لیے دفتری، گھریلو، کاروباری اور سوشل معاملات الگ الگ نمٹانا آسان ہوگا۔
مذکورہ فیچر ابھی تک اپنے ابتدائی مراحل میں ہے، تاہم اسے آن ڈیوائس ملٹی اکاؤنٹ سپورٹ کے نام سے جانا جا رہا ہے۔ یہ فیچر اینڈرائیڈ ڈیوائسز کے لیے بیٹا ورژن میں متعارف کرایا گیا ہے جو ابھی چند صارفین کو دستیاب ہے اور آئندہ چند ہفتوں میں تمام صارفین کے لیے دستیاب ہوگا۔
واٹس ایپ ایک مقبول میسیجنگ ایپلی کیشن ہے جسے دنیا بھر میں 2 ارب سے زیادہ افراد استعمال کرتے ہیں۔ یہ ایپلی کیشن صارفین کو متن، تصاویر، ویڈیوز اور صوتی پیغامات بھیجنے کی اجازت دیتی ہے۔ واٹس ایپ میں گروپ میسجنگ اور ویڈیو کالنگ کی بھی خصوصیات ہیں۔
