باجوڑ( نئی تازہ رپورٹ) جمعیت علمائے اسلام( جے یو آئی) کے ورکرز کنونشن میں خودکش دھماکے کے نتیجے میں 40 افراد جاں بحق جبکہ 100 سے زائد زخمی ہو گئے۔
میڈیا رپورٹس کے مطابق خیبرپختونخوا کے ضلع باجوڑ کے صدر مقام خار میں جمعیت علمائے اسلام (ف) کے زیر اہتمام جاری ورکرز کنونشن میں دھماکہ ہوا، کنونشن میں ایم این اے جمال الدین اور سابق سینیٹر عبدالرشید سمیت کارکنوں کی بڑی تعداد موجود تھی، جے یو آئی حصیل خار کے امیر مولانا ضیاء اللہ جان اور تحصیل ناواگئی کے جنرل سیکرٹری حمیداللہ حقانی دھماکے میں جاں بحق ہوگئے جبکہ جمال الدین اورعبدالرشید محفوظ رہے۔
زخمی ہونے والوں کو طبی امداد کیلئے قریبی ہسپتال جبکہ شدید زخمی ہونے والے افراد کو پشاور ہسپتال منتقل کر دیا گیا، قانون نافذ کرنے والے اداروں نے جائے وقوعہ کو گھیرے میں لے کر سرچ آپریشن شروع کر دیا ہے، باجوڑ، تیمرگرہ، سوات اور پشاور کے ہسپتالوں میں ایمرجنسی نافذ کر دی گئی ہے۔
ترجمان ریسکیو 1122 کے مطابق باجوڑ دھماکے کے زخمیوں کو ہیلی کاپٹر کے ذریعے پشاور منتقل کر دیا گیا۔
آئی جی پولیس خیبرپختونخوا نے بتایا کہ ابتدائی اطلاعات کے مطابق دھماکا خودکش تھا، جائے وقوعہ سے شواہد اکھٹےکیےجارہےہیں۔
