گلگت ( نئی تازہ رپورٹ) پاکستان تحریک انصاف کی طرف سے راجہ اعظم کو وزیراعلیٰ گلگت بلتستان نامزد کردیا گیا۔
عدالت نے سابق وزیر اعلیٰ خالد خورشید کو جعلی ڈگری کیس میں نااہل قرار دے دیا تھا۔ پی ٹی آئی کی پارلیمانی پارٹی نے وزیراعلیٰ گلگت بلتستان کے لیے راجہ اعظم کا نام تجویز کیا۔
ترجمان پی ٹی آئی کے مطابق گلگت بلتستان کی وزارت اعلیٰ کے لیے راجہ اعظم کو متفقہ طور پرپی ٹی آئی کا امیدوار نامزد کیا گیا ہے اورپارٹی چیئرمین نے نامزدگی کی منظوری دے دی ہے۔
گزشتہ روز گلگت کی عدالت نے تحریک انصاف سے تعلق رکھنے والے وزیراعلیٰ خالد خورشید کو جعلی ڈگری کیس میں نااہل قرار دینے کا فیصلہ سنایا تھا۔
پیپلز پارٹی کے عبدالحمید اور (ن) لیگ کے رانا فرمان علی نے خالد خورشید کی ڈگری کو الیکشن کمیشن میں چیلنج کیا تھا جس پر چیف الیکشن کمشنر نے وزیراعلیٰ کو نوٹس جاری کیا تھا۔
واضح رہے کہ وزیراعلیٰ گلگت بلتستان پاس لندن کی ڈگری تھی اور اسی بنیاد پر انہیں گلگت بلتستان بار کونسل نے وکالت کا لائسنس جاری کر رکھا تھا لیکن لندن کی یونیورسٹی کی جانب سے ڈگری کی تصدیق نہیں کی گئی تھی، جس پرگلگت کی عدالت کے 3 رکنی بنچ نے خالد خورشید کو نااہل قرار دے دیا تھا۔
