واشنگٹن (نئی تازہ مانیٹرنگ) امریکی جیل میں قید ڈاکٹرعافیہ صدیقی سے ان کی بڑی بہن ڈاکٹر فوزیہ صدیقی کی ملاقات ہوئی۔
ٹیکساس کے شہر فورورتھ کی جیل ایف ایم سی کارس ول میں ڈھائی گھنٹے طویل ملاقات ڈاکٹر عافیہ سے ان کے خاندان کے کسی فرد کی جیل میں پہلی ملاقات تھی۔
ڈاکٹرعافیہ صدیقی کو امریکی قید میں 13 سال کا طویل عرصہ گزر چکا ہے۔ جبکہ وہ کراچی سے 24 سال قبل لاپتہ ہوئی تھیں۔
جماعتِ اسلامی کے سینیٹر مشتاق احمد کے مطابق بدھ کو جیل میں ڈاکٹر عافیہ سے ان کی پہلی بار اور ڈاکٹر فوزیہ اور کلائیو اسٹافورڈ اسمتھ کی دوسری بار ملاقات ہو گی۔
انہوں نے بتایا کہ ڈاکٹر فوزیہ کی ڈاکٹر عافیہ سے ملاقات میں تشویش ناک صورتِ حال سامنے آئی ہے لیکن پاکستان کی بیٹی کے ساتھ اب ملاقاتوں اور بات چیت کا راستہ کھل گیا ہے ،پاکستان کے عوام آواز اٹھائیں اور حکمرانوں کو مجبور کریں کہ وہ ڈاکٹر عافیہ کی رہائی کے لیے امریکی حکومت سے بات چیت کریں۔
انہوں نے بتایا کہ ڈاکٹر فوزیہ کو اپنی بہن ڈاکٹر عافیہ سے گلے ملنے اور ہاتھ ملانے تک کی اجازت نہیں دی گئی۔
ڈاکٹر فوزیہ کو اس بات کی اجازت بھی نہیں دی گئی کہ وہ ڈاکٹر عافیہ کو ان کے بچوں کی تصاویر دکھا سکیں۔
جیل کے ایک کمرے میں دونوں بہنوں کے درمیان موٹا شیشہ لگا تھا اور اس کے آر پار دیکھتے ہوئے یہ ملاقات ہوئی تھی۔
عافیہ صدیقی سفید اسکارف اور خاکی جیل لباس میں تھیں۔ انہیں اپنی والدہ کی وفات کا علم نہیں ہے۔
انہوں نے بتایا کہ ڈاکٹر عافیہ کو سننے میں مشکل پیش آ رہی تھی جس کی وجہ ان کو سر پرلگنے والی ایک چوٹ ہے۔ جبکہ ان کے سامنے والے دانت جیل میں ایک حملے میں ضائع ہو چکے ہیں۔
