راولپنڈی( نئی تازہ رپورٹ) تھانہ روات کے علاقے بحریہ ٹائون میں مبینہ ڈکیتی کی واردات کے دوران مزاحمت پر ڈاکوؤں نے احتساب بیورو کے حاضر سروس جج کو قتل کردیا۔
پولیس کے مطابق مبینہ ڈکیتی کی واردات میں ملوث ایک ڈاکو کو شدید زخمی حالت میں گرفتار کرلیا گیا ہے۔
پولیس کے مطابق 5 ملزمان واردات کے لیے بحریہ ٹائون فیز8 کے ایک گھر میں داخل ہوئے، جہاں مزاحمت پر فائرنگ ہوئی اور ڈاکوؤں کی فائرنگ سے احتساب بیورو آزاد کشمیرکے جج سردار امجد اسحاق جاں بحق ہوگئے جب کہ ایک ڈاکو کو زخمی حالت میں پکڑلیاگیا۔
اطلاع ملنے پر پولیس نےموقع پر پہنچ کر تحقیقات شروع کردیں۔ سی پی او راولپنڈی خالد ہمدانی نے واقعے کا نوٹس لیتے ہوئے رپورٹ طلب کرلی ہے، انہوں نے ایس پی صدر کو خود موقع پر پہنچ کر شواہد جمع کرنے کی ہدایت کی۔
زخمی ڈاکو کو علاج کے لیے ہسپتال منتقل کر دیا گیا ہے۔ پولیس کے مطابق واقعے کی تمام زاویوں سے تحقیقات کی جا رہی ہیں۔ گرفتار ملزم کے دیگر ساتھیوں کو بھی جلد گرفتار کرلیا جائے گا۔
