اسلام آباد ( نئی تازہ رپورٹ) وزیرِ مملکت برائے پٹرولیم مصدق ملک نے کہا ہے کہ روسی تیل 15 سے 20 روز میں پاکستان میں پہنچ جائےگا۔ بجٹ میں چھوٹے کاروبار والوں کو سہولتیں دینے پر غور کر رہے ہیں۔
ایک انٹرویو میں وزیرِ مملکت مصدق ملک نے کہا کہ گیس پر 1700 ارب روپے کا گردشی قرضہ تھا، ہم اس گردشی قرضے کو صفرپر لے آئے، ایل این جی پر بھی گردشی قرضے کو صفر کر دیں گے ۔ انہوں نے کہا کہ تاریخ میں پہلی بار 2 روسی وزیر 86 رکنی وفد کے ہمراہ پاکستان آئے، روس سے رعایتی قیمت پر تیل مل رہا ہے۔
وزیر مملکت برائے پٹرولیم نے کہا کہ حکومت کی جانب سے حالات کو بہتر کرنے کیلئے مشکل فیصلے کئے جا رہے ہیں، آگے بڑھنے کیلئے ہمیں چھوٹے کاروبار کرنے والوں کو پروموٹ کرنا ہے، بجٹ میں چھوٹے کاروبار کرنے والوں کو سہولتیں دینے پر غور کر رہے ہیں، ہم نے تاپی گیس منصوبے سے سستی گیس لانی ہے، اس پر تیزی سے کام کر رہے ہیں۔
مصدق ملک نے کہا کہ آٹو موٹو پالیسی کو بنائے کئی سال ہو چکے، آج تک ہم ایک انڈیکیٹر کا کور نہیں ایکسپورٹ کر سکے، میرے خیال میں ہماری آٹو موٹو پالیسی بہتر نہیں۔
واضح رہے کہ پاکستان نے روس سے تیل کا آرڈر اپریل میں دیا تھا۔
وزیرِ مملکت برائے پٹرولیم کا کہنا ہے کہ آئین سے ماورا اور قانون سے بالا تر کچھ نہیں ہونا چاہیے، 9 مئی کی ویڈیو کے ذریعے لوگوں کو شناخت کر کے پکڑا جا رہا ہے، نادرا سے تصدیق کے بعد لوگوں کو گرفتار کیا جا رہا ہے۔
