لاہور ( نئی تازہ رپورٹ) اینٹی کرپشن عدالت نے ترقیاتی منصوبوں میں مبینہ کرپشن کے کیس میں پی ٹی آئی کے صدر سابق وزیراعلیٰ پنجاب پرویز الٰہی کی عبوری ضمانت خارج کردی۔
چوہدری پرویز الٰہی اپنی عبوری ضمانت کی میعاد ختم ہونے کے باوجود جمعرات کو بھی اینٹی کرپشن عدالت میں پیش نہ ہوئے۔ وکیل امجد پرویز نےسابق وزیراعلیٰ کی طبی بنیادوں پر حاضری معافی کی درخواست دائر کی۔ وکیل نے مؤقف اختیار کیا کہ پرویز الٰہی کو سینے میں درد ہے، اس لیے پیش نہیں ہو سکتے۔
ترقیاتی منصوبوں میں بے ضابطگیوں کے مقدمے میں اینٹی کرپشن عدالت نے سابق وزیراعلیٰ پنجاب پرویز الٰہی کی حاضری معافی کی درخواست بھی مسترد کردی۔
اس موقع پراسیکیوٹر نے کہا کہ پرویز الٰہی کی میڈیکل رپورٹ جعلی ہے۔ عدالت نے وکیل سے کہا لائیں رپورٹس دکھائیں، ابھی فیصلہ کرتا ہوں۔ عدالت نے میڈیکل رپورٹس فوری پیش کرنے کی ہدایت کردی۔
واضح رہے کہ گزشتہ سماعت پر پرویز الٰہی کی حاضری معافی کی درخواست منظور کی گئی تھی۔ بعد ازاں عدالت میں میڈیکل سرٹیفکیٹ پیش کیا گیا جس کے بعد عدالت نے پرویز الٰہی کی عبوری ضمانت خارج کردی۔
اینٹی کرپشن عدالت سے پرویز الٰہی کی عبوری ضمانت خارج ہونے کے بعدانہیں کسی بھی وقت گرفتار کیا جا سکتا ہے۔
