لاہور ( نئی تازہ رپورٹ) وزیر اعظم شہباز شریف نے مسلم لیگ ق کے سربراہ چودھری شجاعت سے ملاقات کی اور موجودہ سیاسی صورتحال پر تبادلہ خیال کیا ۔
لاہور میں ظہور الہٰی روڈ پرچودھری شجاعت حسین کے گھر ہونے والی ملاقات میں وزیر اعظم شہباز شریف نے سربراہ ق لیگ کی خیریت دریافت کی، ملاقات کے دوران ق لیگ کے رہنما طارق بشیر چیمہ، چودھری شافع حسین اور چودھری سالک حسین بھی موجود تھے۔
ملاقات میں 9 مئی کے واقعات اور موجودہ سیاسی صورتحال پر غور کیا گیا، دونوں رہنماؤں نے 9 مئی کے واقعات میں ملوث کسی بھی ملزم کو کسی قسم کی رعائت نہ دینے پر اتفاق کیا۔
چودھری شجاعت نے سانحہ 9 مئی کی شدید مذمت کرتے ہوئے کہا کہ ملک دشمن عناصر کی جانب سے عوام اورفوج کو لڑوانے کی سازش ناکام ہوگئی، جو لوگ بھی اس گھناؤنے جرم میں ملوث ہیں ان کے خلاف سخت ایکشن لیا جائے۔
