مردان ( نئی تازہ مانیٹرنگ) پولیس نے پاک فوج کے کیپٹن کرنل شیر خان شہید کے مجسمے کی بے حرمتی کرنے اور آگ لگانے والے دو مرکزی ملزمان کو گرفتار کر لیا۔
پولیس کے مطابق شیر عالم اور عدنان نامی ملزمان نے مجسمے کی بے حرمتی کی تھی اور اس کو توڑ کر آگ لگا دی تھی۔
پولیس نے اس سے قبل 17 مئی کو اسی واقعے میں ملوث ایک ملزم رحمت اللہ کو گرفتار کیا تھا۔ ملزم نے مردان میں مظاہرے کے دوران کیپٹن کرنل شیر خان شہید کے مجسمے کی بےحرمتی کی تھی۔
پولیس کے مطابق ملزم رحمت اللہ کو مردان سےگرفتارکیا گیا اور ملزم کی گرفتاری سٹی پولیس کی جانب سے کی گئی۔
پولیس کا کہنا ہے کہ گرفتار ملزم کا تعلق گاؤں حیدر خان سے ہے۔
بعدازاں کیپٹن کرنل شیرخان شہید کے مجسمے کی بےحرمتی کرنے والے ملزم رحمت اللہ کا ویڈیو بیان بھی سامنے آیا ۔
واضح رہے کہ 9 مئی کو عمران خان کی گرفتاری کے بعد مردان میں توڑ پھوڑ کی گئی تھی جس کے دوران کیپٹن کرنل شیر خان شہید کے مجسمے کی بےحرمتی کی گئی اور اسے توڑ کر نذرِ آتش کر دیا گیا تھا۔ پولیس نے ویڈیوز اور دیگر ذرائع سے ملزمان کا سراغ لگایا۔
