جنیوا ( نئی تازہ مانیٹرنگ) عالمی ادارہ صحت (ڈبلیو ایچ او) نے کورونا کی گلوبل ہیلتھ ایمرجنسی کے خاتمے کا اعلان کردیا۔
ڈبلیو ایچ او کےڈائریکٹر جنرل ٹیدروس ادہانوم نے جنیوا میں پریس کانفرنس کرتے ہوئے کورونا کی عالمی صحت ایمرجنسی ختن کرنے کا اعلان کیا۔
کورونا وائرس کا آغاز دسمبر 2019 میں چین سے ہوا تھا اور جنوری 2020 تک یہ وائرس عالمی وبا کی شکل میں دیگر ممالک تک پھیل گیا تھا۔
ڈبلیو ایچ او نے 30 جنوری 2020 کو کورونا کو عالمی ہیلتھ ایمرجنسی قراردے دیا تھا جبکہ 12 مارچ 2020 کو اسے عالمی وبا قرار دیا گیا۔
29 اپریل 2023 تک کے اعدادو شمار کے مطابق کورونا کی وجہ سے گزشتہ ساڑھے تین سال میں دنیا بھر میں 7 کروڑ 65 لاکھ 22 ہزار سے زائد افراد متاثر ہوئے جب کہ اس وبا سے 69 لاکھ 21 ہزار سے زائد افراد ہلاک ہوئے۔
کورونا کی گلوبل ایمرجنسی ختم کرنے سے قبل عالمی ادارہ صحت خبردار کرتا رہا تھا کہ شاید ہی کورونا اب کبھی ختم ہو تاہم اب اس کے کم ہونے کی تصدیق کردی گئی ہے۔
غیر ملکی میڈیا کے مطابق عالمی ادارہ صحت نے 5 مئی سے کورونا کی گلوبل ہیلتھ ایمرجنسی ختم کرنے کا اعلان کرتے ہوئے واضح کیا کہ یہ سمجھنا غلط ہوگا کہ بیماری ختم ہوگئی۔
ٹیدروس ادہانوم نے بتایا کہ 4 مئی کو ڈبلیو ایچ او کے ماہرین صحت کے اجلاس میں کورونا کی تبدیل ہوتی صورتحال پر غور کے بعد تجویز دی گئی کہ اس کی گلوبل ہیلتھ ایمرجنسی کو ختم کردینا چاہئیے۔
انہوں نے بتایا 24 اپریل 2023 تک کورونا سے ہفتہ وار اموات کم ہوکر 3500 تک پہنچ گئی ہیں جب کہ آغاز میں اس سے ہفتہ وار ایک لاکھ تک اموات ہوتی رہیں۔
انہوں نے کہا کہ اگرچہ ہمارے پاس موجود اعدادوشامر کے مطابق کورونا سے مرنے والے افراد کی تعداد 70 لاکھ سے بھی کم ہے لیکن اندازہ ہے کہ اس سے دو کروڑ افراد کے لگ بھگ افراد ہلاک ہوئے ہوں گے۔
انہوں نے کہا کہ اب بھی ممالک، حکومتوں اور اداروں کو کورونا سے حفاظت بارے احتیاطی تدابیر اختیار کر کی ضرورت ہے۔
نئی تازہ مانیٹرنگ
