اسلام آباد ( نئی تازہ رپورٹ ) پاکستان بار کونسل نے سپریم کورٹ کی جانب سے پارلیمنٹ سے منظور کردہ عدالتی اصلاحات بل پر حکم امتناع دینے کے خلاف کل منگل کو یوم سیاہ منانے کا اعلان کردیا۔
میڈیا رپورٹ کے مطابق پاکستان بار کونسل کے زیر انتظام آل پاکستان بار کونسلز کا اجلاس ہوا جس میں پاکستان بار کونسل اور صوبائی بار کونسلز کے عہدے دار شریک ہوئے۔
وائس چیئرمین پاکستان بار کونسل ہارون رشید نے صحافیوں سے گفتگو کرتے ہوئے کہا کہ ازخود نوٹس کے اختیارات چیف جسٹس صاحبان اپنے لیے استعمال کرتے رہے، چیف جسٹس صاحبان کے ازخود نوٹس کے اختیار کے استعمال سے ملک کو نقصان پہنچا۔
انہوں نے کہا کہ دو ججز کے کہنے پر الیکشن بارے از خود نوٹس لیا گیا، انتخابات کا معاملہ ہائی کورٹس میں زیر التواء تھا، از خود نوٹس اس پرلیا جانا چاہیے تھا کہ خیبر پختونخوا اور پنجاب اسمبلیاں کیوں ٹوٹیں مگر ایک جماعت کی مرضی چلاتے ہوئے از خود نوٹس لیا گیا، ادارے حدود میں رہتے ہوئے اپنا کردار ادا کریں، پارلیمنٹ نے اپنا اختیار استعمال کرتے ہوئے اپیل کا حق دیا۔
ہارون رشید نے کہا کہ از خود نوٹس کیلئے قانون بننا چاہیے، حکم امتناع پر وکلا اپنا احتجاج ریکارڈ کروائیں گے، حکم امتناع واپس نہ ہواتو احتجاج جاری رہے گا اور کل منگل کو ملک بھر میں یوم سیاہ منایا جائے گا۔