اسلام آباد ( نئی تازہ رپورٹ)امیر جماعت اسلامی سراج الحق نے کہا ہے کہ صرف دو صوبوں میں الیکشن سے انارکی پھیلے گی، اطہر من اللہ کے نوٹ کے بعد چیف جسٹس کی اخلاقی پوزیشن کمزور ہوچکی، فل کورٹ ہر جمہوریت پسندکا مطالبہ ہے۔
نجی ٹی وی کو انٹرویو میں امیر جماعت اسلامی سراج الحق نے کہا کہ موجودہ بحران کا حل فل کورٹ کی تشکیل ہے، جسٹس اطہر من اللہ کے نوٹ کے بعد چیف جسٹس کی اخلاقی پوزیشن کم زور ہوگئی ۔ سراج الحق نے کہا کہ فل کورٹ کا مطالبہ صرف پی ڈی ایم نہیں، ہر جمہوریت پسندکا مطالبہ ہے۔
امیرجماعت اسلامی نے کہا کہ صرف دو صوبوں میں الیکشن سے انارکی اور افراتفری پھیلےگی۔ ایسا الیکشن مذاق ہوگا۔
دریں اثناامیر جماعت اسلامی سراج الحق نے ایک بیان میں کہا کہ حکمران جماعتوں کے مفادات کی لڑائی میں ملک کا بیڑہ غرق ہوگیا، سیاسی جماعتوں نے ڈائیلاگ کا راستہ نہ اپنایا تو حالات مزید خراب ہوں گے ۔
انہوں نےکہا کہ آج ملک میں آئین و قانون مذاق بن گیا ہے ، قانون صرف غریب کے لیے ہے، تمام ادارے ایک دوسرے کے ساتھ تصادم میں مصروف ہیں، حکمرانوں نے کوئی ایسا کام نہیں کیا جس سے عوام کو ریلیف ملا ہو۔
امیر جماعت اسلامی نے کہا کہ ملک میں دہشت گردی کے واقعات حکومت کی ناکامی ہیں، خیبرپختونخوا میں اغوا برائے تاوان، بھتہ خوری کے واقعات ہوتے رہتے ہیں ۔ سراج الحق نے کہا ملک میں ایک ہی روز شفاف انتخابات مسائل سے نکلنے کا واحد راستہ ہے۔
