اسلام آباد( نئی تازہ رپورٹ) سعودی عرب نے پاکستان کو دو ارب ڈالرکی فنانسنگ کے لیے گرین سگنل دے دیا ۔
ذرائع وزارت خزانہ کے مطابق حکومت پاکستان کی جانب سےآئی ایم ایف کے ساتھ اسٹاف سطح کے معاہدے کیلیے دوست ممالک سے تین ارب ڈالر کی فنانسنگ کے حصول میں اہم پیشرفت ہوئی ہے۔
ذرائع کے مطابق سعودی عرب سے دو ارب ڈالرکی فنڈنگ کا گرین سگنل ملا ہے جبکہ مزید ایک ارب ڈالر کی فنانسنگ کے سلسلہ میں وزیرخزانہ 10 اپریل کو امریکا کے دورے سے پہلے یو اے ای کی اعلیٰ قیادت سے رابطہ کریں گے۔
ذرائع نے بتایا ہے کہ آئی ایم ایف شرح سود میں مہنگائی کے حساب سے مزید اضافے کے مطالبے پر قائم ہے اور سالانہ 900 ارب روپے کی سبسڈی پر اس اعتراض بھی برقرار ہے۔ آئی ایم ایف پٹرولیم لیوی کی مد میں 850 ارب روپے جمع کرنے کے مطالبے پر اصرار کر رہا ہے۔
ذرائع وزارت خزانہ کا کہنا ہے کہ آئی ایم ایف پٹرول اور ڈیزل کی امپورٹ کم کرنے کا خواہاں ہے جبکہ پٹرولیم لیوی اورٹیکسز کا شارٹ فال پورا کرنا بھی عالمی مالیاتی فنڈ کے مطالبات میں شامل ہے۔
