لاہور( نئی تازہ رپورٹ) وفاقی وزیراطلاعات مریم اورنگزیب نے کہا ہےکہ پاکستان میں انصاف غلیلوں اور کلاشنکوف سے خوفزدہ ہے، عمران خان کی دہشت گردی کی وجہ سے سہولت کاری دی جا رہی ہے، یہ شخص آج عدالتوں سے ریلیف کا بنڈل پیکج لے کرجا رہا ہے، عمران خان کو عدالت سے ریلیف دے کر ملک کے انصاف کا قتل کیا گیا۔
اتوار کو اسلام آباد میں پریس کانفرنس کرتے ہوئے وفاقی وزیراطلاعات مریم اورنگزیب نے کہا کہ عمران خان ریاست کی رٹ کے ٹکڑے کر رہے ہیں، انصاف ، قانون اور عدلیہ کی پراسرار خاموشی ملک کے لیے خطرہ بنتی جارہی ہے، لاڈلے کو رعایت دےکر قانون کی بالادستی قائم نہیں ہوسکتی، یہ سلسلہ نہ رکا تو ہرگلی سے جتھے نکلیں گے اور قانون و آئین اور انصاف پر اسی طرح حملہ آور ہوں گے۔
وفاقی وزیراطلاعات نے کہا کہ زمان پارک میں عمران خان کے گھر آپریشن کے دوران کلاشنکوف، پیٹرول بم اور دہشت گرد نکلے، عمران خان کے پاس اپنی چوریوں کا کوئی جواب نہیں، اس لیے وہ پورے ملک کو جلارہے ہیں، فرد جرم رکوانے کے لیے سب حربے استعمال کیےگئے۔
مریم اورنگزیب نے کہا کہ عمران خان اقتدار چھن جانے سے پاگل ہوچکے ہیں، عمران خان نے 4 سال سیاسی دہشتگرد والا کردار ادا کیا، عدالتوں میں پیش نہیں ہو رہے، ان کے پاس جواب نہیں اس لیے پورے ملک کو جلا رہے ہیں۔
انہوں نے کہا کہ عمران خان کے عوام سے کیے گئے تمام وعدے جھوٹ تھے، یہ شخص چور بھی اور جھوٹا بھی ہے، جو حکومت کہہ رہی تھی کل عوام نے وہ سب کچھ دیکھا، ہم کہہ رہے تھے یہ ریاستی رٹ کے اوپر حملہ آور ہوں گے، کل یہ ہتھیاروں سے لیس، جتھوں سے لیس ہو کر اسلام آباد پہنچے۔
مریم اورنگزیب نے کہا پولیس عدالتی احکامات پر عمل کروا رہی تھی، عدالتوں میں پتھر برسائے جا رہے ہیں، عمران خان آج ملک کو ٹکڑے ٹکڑے کر رہا ہے، یہ شخص آج عدالتوں سے ریلیف کا بنڈل پیکج لے کرجا رہا ہے، آج اس دہشتگرد کو کوئی پکڑنے والا نہیں۔
انہوں نے کہا کہ حکومت عوام کو ریلیف دینےکی کوشش کر رہی ہے اور دن رات عمران خان کا ڈالا ہوا گند صاف کر رہی ہے، عمران خان ملک کو دیوالیہ کرگئے، وہ آئی ایم ایف سے جن شرائط کو مان کرگئے تھے ان پر دوبارہ مذاکرات ہو رہے ہیں،