بیجنگ ( نئی تازہ مانیٹرنگ )شی جن پنگ تیسری مدت کے لیے چین کے صدر منتخب ہو گئے ہیں۔
غیر ملکی خبر ایجنسی کے مطابق چین کی نیشنل پیپلز کانگریس (پارلیمنٹ) کے اجلاس میں چین کے نئے صدر کے انتخاب کے لیے ووٹ ڈالے گئے۔ صدر شی کے خلاف صدارت کے لیے کوئی امیدوار مدِ مقابل نہیں تھا۔ اس لئے یہ کارروائی رسمی تھی۔تقریباً 3000اراکین نے 69 سالہ
شی جن پنگ کو متفقہ طور پر منتخب کیا۔
گزشتہ اکتوبر میں برسراقتدار جماعت کمیونسٹ پارٹی کے اجلاس میں شی جن پنگ تیسری مرتبہ پارٹی کے جنرل سیکریٹری منتخب ہوئے تھے ، اس لئے یہ بات یقینی ہوگئی تھی کہ وہی آئندہ 5 برس کے لئے چین کے صدر ہوں گے۔
پارلیمنٹ نے شی جن پنگ کے دو دیرینہ ساتھیوں کا بھی اہم عہدوں کے لئے انتخاب کیا ہے، ژاؤ لیجی کو پارلیمنٹ کا چیئرمین اور ہان زینگ کو ملک کا نائب صدر منتخب کیا گیا ہے۔ دونوں رہنما صدر شی کی ٹیم میں شامل رہےہیں۔
مبصرین کے مطابق چینی انقلاب کے بعد سےماؤزے تنگ کے بعد صدر شی کو چین کی تاریخ کا سب سے طاقت ور حکمران سمجھا جاتا ہے۔
