راولپنڈی ( نئی تازہ سپورٹس ڈیسک) پی ایس ایل کے یکطرفہ مقابلے میں لاہور قلندرز نے اسلام آباد یونائیٹڈ کو 119 رنز سے شکست دے دی۔ٹورنامنٹ میں عمدہ کارکردگی دکھانے والے بلے باز اعظم خان زخمی ہونے کی وجہ سے بیٹنگ کے لئے نہ آسکے۔
راولپنڈی کرکٹ اسٹیڈیم میں جمعرات کو کھیلے گئے پاکستان سپر لیگ کے 26 ویں میچ میں لاہور قلندرز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 226 رنز اسکور کیے۔
لاہور قلندرز کی جانب سے فخر زمان نےدھواں دار بیٹنگ کی اور 57 گیندوں پر 8 چھکوں اور 8 چوکوں کی مدد سے 115 رنز کی اننگ کھیلی۔ کامران غلام 41، سیم بِلنگز 32، ڈیوڈ ویزے 6 اور عبداللہ شفیق 1 رن بنا کر آؤٹ ہوئے۔راشد خان 15 اور سکندر رضا 1 رن بنا کر ناٹ آؤٹ رہے۔ اسلام آباد یونائیٹڈ کی جانب سے فضل الحق فاروقی نے 3 کھلاڑیوں کو پویلین کی راہ دکھائی جبکہ حسن علی اور محمد وسیم نے ایک، ایک وکٹ حاصل کی۔
اسلام آباد یونیٹڈ کی ٹیم 227 رنز کی ہدف کے لئے کھیلتے ہوئے 15.1 اوورز میں 9 وکٹوں کے نقصان پر 107 رنز بنا سکی۔ لیگ میں عمدہ بلے بازی کرنے والےاعظم خان ہاتھ زخمی ہونے کی وجہ سے بیٹنگ کرنے نہیں آسکے۔
اسلام آباد یونائیٹڈ کی جانب سے حسن علی 18، ایلکس ہیلز 18، رحمان گرباز 15، کپتان شاداب خان 12، کولن منرو 11، محمد وسیم 8، آصف علی 7، فہیم اشرف 4 اور مبصر خان 3 رنز بنا آؤٹ ہوئے۔
لاہور قلندرز کی جانب سے راشد خان نے چار، زمان خان اور حارث رؤف نے دو،دو جبکہ ڈیوڈ ویزے نے ایک وکٹ حاصل کی۔
