لاہور ( نئی تازہ رپورٹ)جیل بھرو تحریک کے دوران گرفتاری دینے والے پی ٹی آئی کے رہنمائوں اور کارکنوں کو کوٹ لکھپت جیل منتقل کردیا گیا- پی ٹی آئی رہنمائوں اور کارکنوں کو کوٹ لکھپت جیل میں ہی رکھا جائے گا یا دیگر جیلوں میں بھجوایا جائےگا اس بارے میں محکمہ داخلہ کی ہدایات پر فیصلہ کیا جائے گا-
ایک پولیس ذریعے کے مطابق گرفتار رہنمائوں اور کارکنوں کی تعداد 43 ہے جن میں شاہ محمود قریشی اور دیگر شامل ہیں-تاہم گرفتاریوں کی تعداد کے حوالے سے ابہام پایا جاتا ہے، پی ٹی آئی کے رہنما فواد چوہدری نے دعویٰ کیا کہ 500 سے 700 پارٹی کارکنوں کو گرفتار کیا گیا جب کہ ایک رپورٹ کے مطابق پولیس نے پنجاب حکومت کو بتایا کہ پی ٹی آئی کے81 ارکان کو کوٹ لکھپت بھیجا گیا گیا ہے۔
گرفتاری کے بعد اپنے پہلے بیان میں شاہ محمود قریشی نےپولیس وین میں میڈیا سے بات کرتے ہوئے کہا کہ وہ گرفتاری دینے پر خوش ہیں۔انہوں نے کہا کہ پسی ہوئی عوام کی آواز بننے کیلئے اور بنیادی حقوق کی پاسداری کیلئے میں گرفتاری دے رہا ہوں۔ان کاکہناتھا کہ پارٹی کے کارکن نہیں سب سے پارٹی کے وائس چیئرمین نے اپنی گرفتاری دی ہے،خوف کا بت توڑ دیا ہے ، ہر شہر ہر قصبے کے کارکنوں کیلئے پیغام ہے کہ خوف کا بت توڑ دواورپاکستان کی بقا کیلئے باہر نکلو-