کلرکہار( نئی تازہ مانیٹرنگ) موٹر وے پر ضلع چکوال کے علاقے کلر کہار میں باراتیوں کی بس کے حادثے میں خواتین سمیت 13 افراد جاں بحق اور 60 سے زیادہ زخمی ہوگئے ۔میڈیا رپورٹ کے مطابق کلرکہار موٹروے سالٹ رینجز میں اسلام آباد سے لاہور واپس جانے والی باراتیوں کی بس ٹائر پھٹنے کے بعد کئی گاڑیوں سے ٹکرائی اور الٹ گئی۔ بس میں ایک ہی خاندان کے 86 افراد سوار تھے،
حادثے کے بعد ریسکیو 1122 کے اہلکار جائے وقوعہ پہنچے، لاشوں اور 63 زخمیوں کو نکال کر قریبی اسپتال منتقل کیا۔ ترجمان ریسکیو 1122 کے مطابق بیشتر زخمیوں کی حالت تشویشناک ہے جنہیں کلرکہار کے ٹراما سینٹر منتقل کیا گیا۔حادثے میں 13 افراد جاں بحق ہونے کی تصدیق ہوئی ہے زخمیوں میں سے متعدد کی حالت تشویشناک ہے۔ مرنے والوں میں 6 خواتین بھی شامل ہیں۔
عینی شاہدین نے بتایا کہ ٹائر پھٹنے کے بعد بس بے قابو ہوکر گاڑی سے ٹکرائی اور حفاظتی دیوار توڑتی ہوئی دوسرے روڈ پر چلی گئی، بے قابو مسافر بس نے مخالف سمت سے آنے والی کئی گاڑیوں کو بھی نقصان پہنچایا اور پھر گہرائی میں جاگری۔موٹروے پولیس ترجمان کے مطابق حادثہ میں متعدد کی افراد کی حالت تشویشناک ہے، تین افراد بس میں پھنسے ہوئے ہیں جنہیں بس کاٹ کر نکالنے کی کوشش کی جارہی ہے۔ انہوں نے بتایا کہ بریک فیل ہونے سے بس الٹ گئی تھی جس کے باعث مخالف سمت سے آنے والی دو کاریں اور ایک سوزوکی پک اپ بھی زد میں آئے ۔
