اسلام آباد ( نئی تازہ رپورٹ) سابق وزیراعظم شاہد خاقان عباسی مسلم لیگ ن کے سینئر نائب صد ر کے عہدے سے مستعفی ہوگئے۔میڈیا رپورٹ کے مطابق انہوں نے نواز شریف پر تین سال قبل واضح کیا تھا کہ اگر مریم کو پارٹی میں سینئر عہدے پر لایا گیا تو ان کیلئے پارٹی میں رہنا ممکن نہیں ہوگا۔ ایک سوال کے جواب میں انہوں نے کہا کہ جب سے مریم لندن سے آئی ہیں اس وقت سے ان کی مریم سے بات چیت نہیں ہوئی۔ مریم نواز سے متعلق انہوں نے کہا کہ مجھے خوشی ہے کہ ان کی سرجری کامیاب رہی، میری دعائیں ان کے ساتھ ہیں۔
شاہد خاقان نے کہا کہ وہ کسی بھی موقع پر پارٹی کے چیف آرگنائزر نہیں ہوں گے۔ سابق وزیر اعظم نے کہا کہ وہ آخری دم تک مسلم لیگ ن کے ساتھ رہیں گے لیکن اگر پارٹی نے ان سے راہیں جدا کرلیں تو وہ گھر جانا پسند کریں گے۔ اس سوال پر کہ کیا وہ دوسرے چوہدری نثار بننے جا رہے ہیں تو انہوں نے مسکراتے ہوئے کہا کہ میں حد سے زیادہ پر عزم سیاسی کارکن نہیں ہوں۔ شاہد خاقان نے افسوس کا اظہار کیا کہ عمران خان دن رات سیاسی جماعتوں اور ان کے رہنماؤں کو برا بھلا کہہ رہے ہیں اور یہ سیاسی جماعتیں اس کیخلاف کچھ نہیں کر رہیں۔انہوں نے بتایا کہ ملک کی بہتری کیلئے ’’ری امیجننگ پاکستان‘‘ کے فورم سے پاکستان کی فلاح و بہبود کا پیغام پھیلانے کا فیصلہ کیا ہے. میرا ’’ری امیجننگ پاکستان‘‘ فورم کسی شخص یا پارٹی کیخلاف نہیں ، عوام بڑی تعداد میں اس فورم کی سرگرمیوں کا حصہ بن رہے ہیں۔ شاہد خاقان عباسی نے بتایا کہ فورم کا اگلا سیمینار 18فروری کو کراچی میں ہوگا۔
