پشاور( نئی تازہ رپورٹ) انٹیلی جنس بیورو( آئی بی) کے سابق ڈی جی مسعود شریف دل کا دورہ پڑنے سے انتقال کر گئے- 5 جون 1950 کو کرک میں پیدا ہونے والے مسعود شریف خان خٹک کا انتقال 72 برس کی عمر میں دل کا دورہ پڑنے سےکوہاٹ میں ہوا ، مسعود شریف کی نماز جنازہ ضلع کر ک کے علاقے میں ادا کی جائے گی جبکہ تدفین بلند کلہ میں آبائی قبرستان میں ہو گی۔مسعود شریف مرحوم نے سوگوران میں ایک بیوہ، ایک بیٹا اور 2 بیٹیاں چھوڑی ہیں-
مسعود شریف 1992 سے 1993 تک وفاقی تحقیقاتی ادارے (ایف آئی اے) کے ڈائریکٹر جنرل رہے جبکہ پاکستان پیپلز پارٹی کے دور حکومت میں 1993 سے 1996 تک آئی بی کے ڈائریکٹر جنرل کی ذمہ داریاں سر انجام دیں۔ مرحوم نے 1999 سے 2008 کے دوران پاکستان پیپلز پارٹی کے نائب صدر رہے۔مسعود شریف خٹک 2002 کے عام انتخابات میں متحدہ مجلس عمل کے امیدوار مولانا شاہ عبدالعزیز کے مقابلہ میں ناکام رہے تھے، 2008 میں جنرل (ر) پرویز مشرف کے ساتھ جماعت کے مبینہ سیاسی سمجھوتے کے خلاف احتجاجاً پیپلزپارٹی سے الگ ہو گئے تھے۔2018 کے عام انتخابات سے قبل مسعود شریف نے پاکستان تحریک انصاف میں شمولیت اختیار کی، لیکن کچھ عرصہ بعد ہی مستعفی ہو گئے ۔
