وزیر اعظم شہباز شریف جمعرات کو متحدہ عرب امارا ت کے دو روزہ سرکاری دورے پر روانہ ہو گئے۔ صدر شیخ محمد بن زاید النہیان سمیت اہم حکومتی شخصیات سے ملاقات ہوگی۔ اقتصادی، تجارتی اور سرمایہ کاری کے تعلقات، پاکستانی افرادی قوت کے لیے مواقع پر تبادلہ خیال کیا جائے گا۔
ترجمان دفتر خارجہ کے مطابق وزیراعظم متحدہ عرب امارات کے صدر شیخ محمد بن زاید النہیان کی دعوت پر یو اے ای کا دورہ کر رہے ہیں۔
اعلی سطح کا وفد بھی وزیراعظم کے ہمراہ ہے ۔ گذشتہ سال اپریل میںوزارت عظمی کا عہدہ سنبھالنے کے بعد یہ وزیراعظم کا متحدہ عرب امارا ت کا تیسرا دورہ ہے
دورے کے دوران وزیراعظم متحدہ عرب امارات کے صدر سے ملاقات کریں گے اور دونوں برادر ممالک کے درمیان اقتصادی، تجارتی اور سرمایہ کاری کے تعلقات کے فروغ اور متحدہ عرب امارات میں پاکستانی افرادی قوت کے لیے مواقع پیدا کرنے سے متعلق امور پر تبادلہ خیال کریں گے۔ دفتر خارجہ کے مطابق دونوں رہنما باہمی دلچسپی کے مختلف علاقائی اور عالمی امور پر بھی تبادلہ خیال کریں گے۔ شہباز شریف متحدہ عرب امارات کے وزیراعظم اور نائب صدر اور دبئی کے حکمران شیخ محمد بن راشد المکتوم سے بھی ملاقات کریں گے۔
