مانچسٹر (نئی تازہ رپورٹ) سنی رویت ہلال بورڈ یو کے نے واضح کیا ہے کہ 30 مارچ اتوار کو عید منانے والوں پر روزے کی قضا واجب ہے کیونکہ عید کا چاند نظر 30 مارچ کو نظر آیا اور چاندنظر آنے کے بعد ہی 31 مارچ پیر کو عید منائی گئی ۔
این این آئی نیوز ایجنسی کے مطابق سنی رویت ہلال بورڈ یو کے کا اجلاس جامع مسجد انوار الحرمین چیتھم ہل مانچسٹر میں منعقد ہوا جس کی صدارت مفکر اسلام حضرت مولانا علامہ قمر الزمان اعظمیٰ نے کی ۔
رویت ہلال بورڈ کے اجلاس میں علماءکرام کی بڑی تعداد نے شرکت کی جن میں علامہ ظفر محمود فراشوی ،علامہ ساجد ہاشمی برنلے ، علامہ دین محمد سیالوی نیلسن ، مولانا فضل قیوم مانچسٹر ، مولانا ابو یو شام چیڈل ، مولانا مفتی سہیل رضا ، مولانا نظام اشرف ، مفتی محمد ایوب اشرفی ، مولانا ارشد مصباحی اور پیر نواالعارفین صدیقین اور دیگر علماءکرام شامل تھے ۔
سنی رویت ہلال بورڈ یو کےاجلاس میں عید الفطر کا چاند نظر آنے اور عید بروز پیر 31 مارچ 2025 کو منانے کا اعلان کیا گیا تھا ۔ اجلاس میں واضح کیا گیا گیا کہ جن افراد نے بغیر کسی شرعی شہادت کے چند اسلامی ممالک کی تائید میں اتوار 30مارچ کو عید منائی تھی ان پر اس روزے کی قضا واجب ہے کیونکہ دنیا میں کہیں بھی چاند نظر آنے کی شہادت نہیں ملی ۔
