اسلام آباد ( نئی تازہ نیوز) پاکستان تحریک انصاف کے بانی چیئرمین عمران خان نے پارٹی کے رکن قومی اسمبلی شیر افضل مروت کو پارٹی سے نکالنے کی ہدایات جاری کر دی ہیں۔ میڈیا رپورٹ کے مطابق پی ٹی آئی کی قیادت نے شیر افضل مروت کو پارٹی سے نکالنے کا فیصلہ کیا ہے اور اس حوالے سے عمران خان نے پارٹی رہنماؤں کو ہدایت دی ہے کہ ان کی بنیادی رکنیت کو ختم کیا جائے۔
اس اقدام کے بعد پارٹی رہنما شیر افضل مروت سے بطور رکن قومی اسمبلی استعفیٰ طلب کریں گے۔ یہ فیصلہ شیر افضل مروت کے صوابی جلسے میں کردار پر پارٹی رہنماؤں کی شکایات کے بعد کیا گیا۔
دوسری جانب پی ٹی آئی خیبرپختونخوا میں عہدوں میں مزید رد و بدل کا عمل جاری ہے۔ جنید اکبر کی صوبائی صدارت سنبھالنے کے بعد بیرسٹر سیف کو پی ٹی آئی خیبرپختونخوا کے سیکرٹری اطلاعات کے عہدے سے ہٹا دیا گیا۔ جنید اکبر نے پارٹی کے صوبائی سیکرٹری اطلاعات کا عہدہ ملک عدیل اقبال کو سونپ دیا، جبکہ پی ٹی آئی خیبرپختونخوا کے ڈپٹی سیکرٹری کے عہدے کی ذمہ داری ذیشان ایڈووکیٹ کو تفویض کر دی گئی۔ ان دونوں عہدوں کی تعیناتی کا اعلامیہ بھی جاری کر دیا گیا ہے۔
