اسلام آباد ( نئی تازہ ڈیسک) اسلام آباد ہائی کورٹ نے عدت نکاح کیس میں پاکستان تحریک انصاف کے بانی عمران خان اور سابق خاتون اول بشریٰ بی بی کی بریت کے خلاف خاور مانیکا کی اپیل سماعت کے لیےمقرر کردی۔
میڈیا رپورٹ کے مطابق کیس کی سماعت کل پیر کو اسلام آباد ہائی کورٹ کے نئے جج جسٹس اعظم خان کریں گے۔ خاور مانیکا نے 13 جولائی 2024 کے ایڈیشنل سیشن جج کے بریت کے فیصلے کو چیلنج کیا ہے اور اس فیصلے کو کالعدم قرار دینے کی استدعا کی ہے۔
یاد رہے کہ ایڈیشنل سیشن جج نے 13 جولائی 2024 کو عمران خان اور بشریٰ بی بی کو عدت نکاح کیس میں بری کردیا تھا، تاہم بشریٰ بی بی کے سابق شوہر خاور مانیکا نے اس فیصلے کے خلاف اپیل دائر کر رکھی ہے۔
واضح رہے کہ ڈسٹرکٹ اینڈ سیشن کورٹس اسلام آباد نے عدت نکاح کیس میں سینئر سول جج قدرت اللہ کی جانب سے دی گئی 7، 7 سال قید کی سزا کو کالعدم قراردیا تھا۔
مقدمے کی سماعت کے دوران عمران خان کے وکیل سلمان اکرم راجہ اور بشریٰ بی بی کے وکیل عثمان ریاض گل نے استغاثہ کے تمام گواہوں پر جرح کی تھی۔ گواہوں میں خاور مانیکا، عون چوہدری، نکاح خواں مفتی سعید اور ملازم لطیف شامل تھے، جو عدالت میں پیش ہوئے تھے۔
