اسلام آباد: وفاقی وزارت مذہبی امور نے حج 2025 کے لیے پرائیویٹ حج منظم کمپنیوں اور ذیلی کمپنیوں کو بکنگ کی اجازت دے دی ہے- جبکہ پرائیویٹ عازمین حج کے لیے پیکیج کی تفصیلات بھی جاری کردی ہیں۔
ترجمان وزارت مذہبی امور نے کہا کہ نجی حج اسکیم کی بکنگ 10 جنوری سے 31 جنوری 2025 تک جاری رہے گی، نجی حج اسکیم کے مختلف حج پیکیجز وزارت کی ویب سائٹ پر دیکھے جا سکتے ہیں۔
انہوں نے کہا کہ نجی اسکیم کے بنیادی حج پیکیج پونے 11 لاکھ سے ساڑھے 21 لاکھ کے درمیان رکھے گئے ہیں،کمپنیاں سہولیات کی فراہمی کے معاہدے ایس پی اے کے مطابق پرائیویٹ عازمین حج کی بکنگ کریں۔
ترجمان کے مطابق اضافی سہولیات کے باعث 30 لاکھ سے زائد مالیت حج پیکیج “حج پالیسی فارمولیشن کمیٹی” سے منظور کرانا ہوگا، حج منظم کو 30 لاکھ سے زائد مالیت حج پیکیج کی منظوری کے وقت مکمل تفصیلات فراہم ہوں گی۔
انہوں نے بتایا کہ 3 ملین سے زائد کے حج پیکیج بیچنے اور خریدنے والوں کے کوائف ایف بی آر اور متعلقہ اداروں کے ساتھ شیئر کیے جائیں گے۔
ترجمان وزارت مذہبی امور نے کہا کہ نجی عازمینِ حج بکنگ کے وقت وزارت کی ویب سائٹ اور موبائل ایپ “پاک حج” سے لازمی تصدیق کر لیں، رقم کا لین دین صرف کمپنی کے بینک اکاؤنٹ کے ذریعے کریں اور سہولیات کا معاہدہ لازمی طلب کریں۔
