اسلام آباد : حکومت نے ملک میں آئندہ 15 روز کے لیے پیٹرولیم مصنوعات کی قیمتوں میں ردوبدل کا اعلان کر دیا ہے۔
وزارت خزانہ کی جانب سے جاری کردہ نوٹیفکیشن کے مطابق پیٹرول کی قیمت میں 3 روپے 72 پیسے فی لیٹر کا اضافہ کیا گیا ہے، جس کے بعد نئی قیمت 252 روپے 10 پیسے فی لیٹر مقرر کی گئی ہے۔ اسی طرح ہائی اسپیڈ ڈیزل (HSD) کی قیمت میں بھی 3 روپے 29 پیسے فی لیٹر کا اضافہ ہوا ہے، جس سے نئی قیمت 258 روپے 43 پیسے فی لیٹر ہو گئی ہے۔
وزارت خزانہ کے مطابق مٹی کے تیل کی قیمت میں 62 پیسے فی لیٹر اور لائٹ ڈیزل آئل کی قیمت میں 48 پیسے فی لیٹر کمی کی گئی ہے۔ نئی قیمتیں یکم دسمبر2024 سے نافذ العمل ہوں گی۔
واضح رہے کہ حالیہ تبدیلیوں سے قبل حکومت نے 15 نومبر کو پیٹرول اور ڈیزل کی قیمتیں برقرار رکھنے کا فیصلہ کیا تھا، جس کے تحت پیٹرول کی قیمت 248 روپے 38 پیسے اور ہائی اسپیڈ ڈیزل کی قیمت 255 روپے 14 پیسے تھی۔
سرکاری ذرائع کے مطابق عالمی منڈی میں خام تیل کی قیمتوں میں اتار چڑھاؤ ان تبدیلیوں کا بنیادی سبب ہے۔
