کوئٹہ( نئی تازہ مانیٹرنگ) بلوچستان کے علاقہ موسیٰ خیل میں مسلح افراد نے شاہراہ پرپنجاب سے تعلق رکھنے والے 23 مسافروں کومختلف گاڑیوں سے اتار کرفائرنگ کر کے قتل کر دیا۔
نجی ٹی وی کے مطابق ایس ایس پی موسیٰ خیل ایوب اچکزئی نے بتایا کہ بین الصوبائی شاہراہ پر راڑہ شم کے قریب مسلح افراد نے ناکہ لگا کریہ مذموم کارروائی کی۔
رپورٹ کے مطابق مسلح افراد نے متعدد ٹرکوں اور بسوں سے پنجاب سے تعلق رکھنے والے 23 مسافروں کو اتارا اور انہیں گولیوں کا نشانہ بنایا، اور فرار ہو گئے۔
اسسٹنٹ کمشنر نجیب کاکڑ کے مطابق مسلح افراد نے فرار ہونے سے قبل 10 سے زائد گاڑیوں کو آگ لگا دی۔ قتل ہونے والے تمام افراد کا تعلق پنجاب کے مختلف علاقوں سے ہے۔
واقعہ کی اطلاع ملنے پر پولیس کی بھاری نفری اور لیویز حکام موقع پر پہنچ گئے، تمام لاشوں کو ہسپتال منتقل کر دیا گیا ہے۔
