دبئی ( نئی تازہ مانیٹرنگ) لیجنڈری پاکستانی گلوکار راحت فتح علی خان کی دبئی ائرپورٹ پر گرفتاری ہو ئی یا نہیں ، تفصیلات سامنے آگئیں ۔
نجی ٹی وی کے مطابق راحت فتح علی خان کی جانب سے بیان میں کہا گیا ہے کہ ان کی گرفتاری نہیں ہوئی، ائرپورٹ پر نارمل چیکنگ اور سوال جواب ہوئے تھے، اب وہ اپنا کام کررہے ہیں۔
راحت فتح علی خان کے بیان میں کہا گیا کہ ان سے سوال جواب کیلئے دبئی حکام کو درخواستیں دی گئی تھیں جو کوئی بھی دے سکتا ہے۔
اس حوالے سے میوزک ڈائریکٹر فاروق راؤ نے کہا ہے کہ راحت فتح علی دبئی میں گانوں کی ریکارڈنگز کررہے ہیں۔
میڈیا رپورٹ کے مطابق راحت فتح علی خان کے سابق مینیجر سلمان احمد نے ان کے خلاف دبئی حکام کو شکایات درج کرارکھی ہیں۔
یاد رہے کہ راحت نے چند ماہ قبل اپنے مینیجر کو برطرف کردیا تھا، دونوں نے ایک دوسرے کے خلاف مقدمات درج کرائے ہوئے ہیں۔
اس سے قبل پاکستان کے نجی ٹی وی چینل جیو نیوز نے اپنی رپورٹ میں کہا تھا کہ راحت فتح علی خان کو دبئی ائیرپورٹ پر گرفتار کرلیا گیا ہے، اور انہیں گرفتار کرکے بُرج دبئی پولیس اسٹیشن میں رکھا گیا ہے۔
ذرائع کے مطابق راحت فتح علی خان اپنےکنسرٹس کے سلسلے میں دبئی پہنچے تھے۔
